Pal-do-Pal

Afroz Alam

bas

pal-do-pal ki baat hai

be-sabab pareshan hote ho

tumhen kis baat ka gham hai

kyuun udaas rahte ho

dekho

in nazaron ko

mast absharon ko

nadiyon aur pahadon ko

suraj

chand

sitaron ko

galiyon ko bazaron ko

shayad tum bahal jaao

socho jab tum aae the

is tarah ro rahe the

jaise bachche ke haath se khilauna chhin gaya ho

phir tum ne jo kuchh liya yahin se liya

jo kuchh bhi diya yahin pe diya

phir kyuun udaas rahte ho

bas pal-do-pal ki baat hai

tum be-sabab pareshan hote ho