Poet
rahnumaon ki baat karte ho
parsaon ki baat karte ho
jo uḌa len saron se anchal bhi
un havaon ki baat karte ho
jal rahi hai zamin ki kokh magar
tum ḳhalaon ki baat karte ho
mujh ko mehnat ka bhi sila na mila
tum duaon ki baat karte ho
pahle insan ko zahr dete ho
phir davaon ki baat karte ho
meri basti men bhuuk palti hai
tum balaon ki baat karte ho
maar Daala vafa-shi.aron ne
be-vafaon ki baat karte ho
kitne fir.aun miT ga.e aa kar
kin ḳhudaon ki baat karte ho
Leave a Reply