Sabiha Saba
durust hai ki ye din raegan nahin guzre
magar sukun se to ai jan-e-jan nahin guzre
mizaj-e-shahr-e-junun ab ye barhami kaisi
kis aag se tire pir-o-javan nahin guzre
nazar se duur sahi phir bhi kushtagan-e-vafa
vahan se kam to ye sadme yahan nahin guzre
muravvatan vo miri baat puchh kar chup hain
vagarna kab mire shikve garan nahin guzre
samundaron ki hava duur duur se na guzar
vahan ka haal suna ham jahan nahin guzre
hujum-e-kar jahan ho ki dasht-e-jan ka sukut
tire firaq ke sadme kahan nahin guzre
guzar gae vo jo jaan se magar ye hasrat hai
koi ‘saba’ se ye kah de miyan nahin guzre
Leave a Reply