nit-na.e naqsh se batin ko sajata hua main
apne zahir ke ḳhad-o-ḳhal miTata hua main
lahza lahza ye fida hoti hui mujh pe hayat
aur har aan nazar us se churata hua main
jaane kis rut men khilenge yahan ta.abir ke phuul
sochta rahta huun ab ḳhvab ugata hua main
har ghaḌi baḌhti hui tishna-labi ishq tiri!
dil ke riste hue zaḳhmon se bujhata hua main
roz hota hua mujh men kisi ḳhvahish ka janam
roz hi qabr na.i ḳhud men banata hua main
rahrav-e-shauq! karo yuun! mire pichhe aao
aao chalta huun tumhen raah dikhata hua main
ab kahan vaise hain idrak ke lamhat nasib
yaad men kho ke tiri ḳhud ko vo paata hua main
aaj bhi yaad hain ‘sarim’ ko manazir saare
har ada par vo tiri jaan se jaata hua main
Leave a Reply