is tarah paikar-e-vafa ho jaa.en
ek duuje ka aasra ho jaa.en
aao mil baiTh kar hansen bolen
nahin ma.alum kab juda ho jaa.en
dukh kisi ko ho ham taḌap uTThen
is qadar dard-ashna ho jaa.en
ḳhushk dharti chaTaḳh rahi ho jab
bhari barsat ki ghaTa ho jaa.en
shahar jamid hai log be-avaz
aise mahaul men sada ho jaa.en
dushmanon ke liye banen sarsar
doston ke liye saba ho jaa.en
jo hamen dekhe dekh le ḳhud ko
sar-ba-sar sat.h-e-a.ina ho jaa.en
aag dil ki agar bhaḌak uTThe
ye dhundalke sahar-numa ho jaa.en
rang-e-alam badal raha hai ‘hazin’
nahin ma.alum kya se kya ho jaa.en
Leave a Reply