kahne ko yahan jiine ka saman bahut hai
ik tu jo nahin zindagi viran bahut hai
milta hai sar-e-rah to katrata hai mujh se
ab apne kiye pe vo pasheman bahut hai
chehre ke ta.assur se to lagta hai ki ḳhush hai
gar ruuh men jhanko to pareshan bahut hai
phenk aaya tha vo mujh ko kisi andhi gupha men
manzil pe mujhe pa ke vo hairan bahut hai
siita hai agar tu tujhe paana nahin mushkil
tere liye bas raam ka ik baan bahut hai
ik harf-e-mohabbat hi asasa hai ‘zafar’ ka
arzan jo zamane men miri jaan bahut hai
Leave a Reply