Tere Jaisa Koi Mila Hi Nahin

Fahmi Badayuni

tere jaisa koi mila hi nahin

kaise milta kahin pe tha hi nahin

ghar ke malbe se ghar bana hi nahin

zalzale ka asar gaya hi nahin

mujh pe ho kar guzar ga.i duniya

main tiri raah se haTa hi nahin

kal se masruf-e-ḳhairiyat main huun

sher taaza koi hua hi nahin

raat bhi ham ne hi sadarat ki

bazm men aur koi tha hi nahin

yaar tum ko kahan kahan DhunDa

jaao tum se main bolta hi nahin

yaad hai jo usi ko yaad karo

hijr ki dusri dava hi nahin