aḳhirash ara.ishon ki zindagi chubhne lagi
uub si hone lagi mujh ko ḳhushi chubhne lagi
main na kahta tha ki thoḌi c havas baaqi rakho
dekh lo ab is tarah asudgi chubhne lagi
ḳhvab ka sailab kya guzra nigahon se miri
ret palkon se jo chipki niind bhi chubhne lagi
tirgi ka dasht naapa raushni ke vaste
raushni phaili to mujh ko raushni chubhne lagi
saḳht ek lamhe ki rau men aa ke tauba kar ga.e
halq men mere magar ab tishnagi chubhne lagi
ik pashemani si thi mujh ko miri avaz se
aur jab main chup hua to ḳhamushi chubhne lagi
ye bhi kya hai bhed mera khol do tum barha
yaar ‘saurabh’ ab to teri muḳhbiri chubhne lagi
Leave a Reply