Rasheed Qaisrani
hai shauq to be-saḳhta ankhon men samo lo
yuun mujh ko nigahon ke tarazu men na tolo
main bhi huun kisi aankh se Tapka hua moti
mujh ko bhi kisi reshmi Dori men piro lo
laaya huun main ḳhud dil ko hatheli pe saja kar
is jins ke bazar men kya daam hain bolo
main kanch ke TukḌon ki tarah bikhra paḌa huun
bhule se kabhi mujh ko bhi paanv men chubho lo
phir janiye kab vaqt ki raftar thamegi
Thahre hue lamhe ko nigahon men piro lo
ab koi bikherega kaḌi dhuup men gesu
ḳhud apne hi dil ke kisi tah-ḳhane men so lo
din bhar to ‘rashid’ aap ko hansna hi paḌega
rona hai to ab raat ki tanha.i men ro lo
Leave a Reply