Aisha Ayyub
ye ban-sanvar ke miri sadgi men lauT aae
mire ḳhayal miri shairi men lauT aae
use kaho ki miri zaat ab bhi baaqi hai
diya bujha de miri raushni men lauT aae
vo jis tarah se parinde shajar pe lauTte hain
ham apne aap se nikle tujhi men lauT aae
jo main hansun to mira ashk ban ke vo chhalke
kisi tarah se vo meri hansi men lauT aae
ḳhushi mili bhi to ham ko kabhi na raas i
udasiyon ke sabab is ḳhushi men lauT aae
phisalti ret sa hathon se gir gaya tha jo
vo guzra vaqt kabhi phir ghaḌi men lauT aae
hamen to ek hi chehre ka kaam hota hai
haTa ke bhiiḌ ko ham phir usi men lauT aae
baḌe ghurur se nikle the alvida.a kah kar
bas ek baar pukara gali men lauT aae
Leave a Reply