Ishrat Zafar
na sail-e-rang na sayyara mahtab mira
hai mere siine men angara mahtab mira
chhaTi ufuq ki siyah-gard to dikha.i diya
payam-e-vasl ka harkara mahtab mira
ḳhala men muztarib-o-be-qayam meri tarah
ye mere dasht ka banjara mahtab mira
ḳhunuk havaon ka maskan bisat-e-ḳhak miri
lahu ki aanch ka gahvara mahtab mira
chihar samt mare ab-zar aur is men
ghurub hota hua taara mahtab mira
ḳhud apne nuur se karta hai iktisab-e-jamal
vo ek shola-e-avara mahtab mira
tamam raat muḳhatib raha mare dil se
vahi sukut ka favvara mahtab mira
zamin pe dhuum mire zaḳhm-e-na-shagufta ki
falak pe hasil-e-nazzara mahtab mira
main justuju men usi kuza-gar ki huun ‘ishrat’
hai jis ke chaak ka fan-para mahtab mira
Leave a Reply