Dinesh Kumar Drouna
a.ine ke is taraf se us taraf aate hue
umr guzri hai ḳhudi ko ḳhud se milvate hue
yuun samajh liije hamari ishq men bechargi
Duub jaana tha hamen tairakiyan aate hue
jaane us shab kya hua tha meri aql-o-hosh ko
ḳhud bahakne lag gaya tha us ko samjhate hue
be-sabab kuchh bhi nahin tha be-sabab tanqid bhi
vo miTa.e ja raha tha naqsh-e-pa jaate hue
aap ke pichhe guzari zindagi mat puchhiye
kaTni thi kaaT li rote hue gaate hue
ab na liije naam us ka dil ki jis ki zid kiye
so gaya hai thak-thaka kar rote chillate hue
Leave a Reply