Kaise Manzar Hain Jo Idrak Mein Aa Jate Hain

kaise manzar hain jo idrak men aa jaate hain

jaise moti kisi poshak men aa jaate hain

main jhatakti huun sabhi zehn se ye vahm-o-guman

phir bhi aksar ye miri taak men aa jaate hain

jaisa bheja hai mujhe aap ne paigham-e-vafa

aise naame to kai Daak men aa jaate hain

apni hasti pe guman itna na kiije sahab

paikar-e-khak to phir khaak men aa jaate hain

jin ko ankhon men basane ki ijazat bhi nahin

vo tasavvur dil-e-bebak men aa jaate hain

nahin hote hain jo chehre se ayaan ranj-o-alam

vo sabhi sina-e-sad-chak men aa jaate hain

Leave a Comment