achchhe iisa ho marizon ka khayal achchha hai
ham mare jaate hain tum kahte ho haal achchha hai
tujh se mangun main tujhi ko ki sabhi kuchh mil jaae
sau savalon se yahi ek saval achchha hai
dekh le bulbul o parvana ki betabi ko
hijr achchha na hasinon ka visal achchha hai
aa gaya us ka tasavvur to pukara ye shauq
dil men jam jaae ilahi ye khayal achchha hai
ankhen dikhlate ho joban to dikhao sahab
vo alag bandh ke rakkha hai jo maal achchha hai
barq agar garmi-e-raftar men achchhi hai ‘amir’
garmi-e-husn men vo barq-jamal achchha hai
Leave a Reply