savab hai ya kisi janam ka hisab koi chuka raha huun
jo ghar ke angan men chinTiyon ko main roz aaTa khila raha huun
main raqs karta hua bagula jo dasht-e-jan men bhaTka chuka hai
ab apni sanson ki andhiyon se bas apni miTTi uḌa raha huun
vo manzilen kya ye raste bhi mujhi ko le kar bhaTak ga.e hain
na chal raha huun na ruk raha huun na ja raha huun na aa raha huun
qarib aati har ek shai ne mira nazriya badal diya hai
main jis ke pichhe paḌa hua tha usi se pichha chhuḌa raha huun
vo rabt-e-baham nahin hai lekin abhi bhi rishta bana hua hai
vo mujh se duuri baḌha raha hai main us se qurbat ghaTa raha huun
mire hi apne muhib saa.e mujhi ko ghere khaḌe hue hain
kisi ko ankhen dikha raha huun kisi se ankhen chura raha huun
main aa.ina huun to kaun hai ye aa.ina hai to kaun huun main
inhin savalon se tang aa kar main sab shabihen haTa raha huun
mujhe yaqin hai ise jala kar main apne sab Dar miTa sakunga
so ek kapḌe men ruui bhar kar main apna putla bana raha huun
Leave a Reply