Sohail Azad
ahval-e-pareshan par kuchh tabsira us ka bhi
halat ke sirhane kuchh der vo roya bhi
tajdid-e-ta.alluq par kya harf ki jab us ne
rishton ki ibarat ko likh likh ke miTaya bhi
sadiyon ki masafat thi ab qissa-e-mazi hai
ummid ke dariya bhi ehsas ke sahra bhi
kuchh der ko dam lene Thahre the yahan sathi
pairon se lipaTne ko tayyar hai rasta bhi
likkha tha jo afsana vo ret pe likkha tha
paani pe banaya tha jo naqsh banaya bhi
kaghaz ye samajhta hai baar us pe ḳharashen men
yaan ḳhun-e-jigar Tapka jo lafz ki likkha bhi
‘azad’ tujhe us ne apna nahin samjha bas
go haal bhi puchha tha aur haath milaya bhi
Leave a Reply