Kunwar Bechain
umr-bhar kuchh is tarah ham jagte sote rahe
bhiiḌ men hanste rahe tanha.i men rote rahe
raushni ki thi kahan fursat jo vo ye sochti
kaise kaise us ki ḳhatir ham havan hote rahe
dhuup ki faslen ugengi ye hamen ma.alum tha
phir bhi ham sab ke dilon men chandni bote rahe
saare bojhon ko baḌa achraj hai kaise ham unhen
phuul jaisi zindagi ki piiTh par Dhote rahe
un hi zaḳhmon ne hamen saunpi karahen ai ‘kunvar’
jin ke munh ham ansuon ke niir se dhote rahe
Leave a Reply