bashar ke faiz-e-sohbat se liyaqat aa hi jaati hai
pari-zadon ko aḳhir adamiyat aa hi jaati hai
javani se diya vo hote hain ghafil za.ifi men
nasim-e-sub.h chalti hai to ghaflat aa hi jaati hai
kilid-e-qufl mushkil hoti hai dad-o-dahish aḳhir
saḳhi ke ek din aaḌe saḳhavat aa hi jaati hai
raqib us shoḳh se jab garmiyan karte hain mahfil men
nahin qaabu men dil rahta hararat aa hi jaati hai
hamen bhi yaad kar lete hain vo bhule se sohbat men
kabhi ham be-nasibon ki bhi naubat aa hi jaati hai
tabi.at ko na kyunkar ghair ke mazmun se nafrat ho
ki jhuTi chiiz se aksar karahat aa hi jaati hai
baja kahte hain jo kahte hain ye ḳhidmat se azmat hai
ki kaam insan ke ik din riyazat aa hi jaati hai
ajab sar-garm-e-koshish ho muqaddar men jo hoti hai
to haath insan ke ik roz daulat aa hi jaati hai
ta.assuf karte hain vo dekh kar mera dil-e-viran
ḳharabe par guzarte hain to ghairat aa hi jaati hai
dabaya jab raqibon ko to bole yaar kya kahna
jo arbab-e-haya hain un ko ghairat aa hi jaati hai
hasinon ko hi zeba husn-e-surat par ghurur apne
har ik arbab-e-daulat ko ra.unat aa hi jaati hai
ajab shai hai ḳhushi bhi sun ke vasl-e-yar ka muzhda
mariz-e-hijr ke chehre pe vahshat aa hi jaati hai
chhupane se nahin chhupta hai husn-e-dil-kash-e-alam
kahin ho dekhne men achchhi surat aa hi jaati hai
sikha deta hai iqbal aadmi ko nek-o-bad aḳhir
ye daulat hai vo shai shan-e-riyasat aa hi jaati hai
tavajjoh mun.imon ki naf.a se ḳhali nahin hoti
hava-e-gosha-e-daman-e-daulat aa hi jaati hai
sitam-dida jo hain vo zikr-e-afat se bhi Darte hain
‘qalaq’ nam-e-shab-e-furqat se dahshat aa hi jaati hai
Leave a Reply