Lala-O-Gul Mein Bikhar Jaenge Hum

Noor Bijnauri

lala-o-gul men bikhar ja.enge ham

kaun kahta hai ki mar ja.enge ham

din isi fikr men kaaTa ham ne

raat aa.i to kidhar ja.enge ham

aur ho jaa.e andhera gahra

zindagi aur nikhar ja.enge ham

aur barham ho nizam-e-hasti

dil ye kahta hai sanvar ja.enge ham

muntazir hai koi kanTon se pare

paanv kaT jaa.en magar ja.enge ham

dekh len ham ko zamane vaale

sang-o-ahan men utar ja.enge ham

jagmagate hue aivanon se

aa.ina le ke guzar ja.enge ham

miT bhi ja.enge to manind-e-ghubar

shah-rahon pe bikhar ja.enge ham

‘nur’ jaulan hai samand-e-vahshat

aaj ta-hadd-e-nazar ja.enge ham