Lala-O-Gul Mein Bikhar Jaenge Hum

lāla-o-gul meñ bikhar jā.eñge ham

kaun kahtā hai ki mar jā.eñge ham

din isī fikr meñ kaaTā ham ne

raat aa.ī to kidhar jā.eñge ham

aur ho jaa.e añdherā gahrā

zindagī aur nikhar jā.eñge ham

aur barham ho nizām-e-hastī

dil ye kahtā hai sañvar jā.eñge ham

muntazir hai koī kāñToñ se pare

paañv kaT jaa.eñ magar jā.eñge ham

dekh leñ ham ko zamāne vaale

sañg-o-āhan meñ utar jā.eñge ham

jagmagāte hue aivānoñ se

aa.ina le ke guzar jā.eñge ham

miT bhī jā.eñge to mānind-e-ġhubār

shāh-rāhoñ pe bikhar jā.eñge ham

‘nūr’ jaulāñ hai samand-e-vahshat

aaj tā-hadd-e-nazar jā.eñge ham

Leave a Comment