andheri raat ko din ke asar men rakkha hai
charagh ham ne tiri rahguzar men rakkha hai
ye hausla jo abhi bal-o-par men rakkha hai
tumhari yaad ka jugnu safar men rakkha hai
makan men sone ke shishe ke log hon jaise
kisi ka nuur kisi ki nazar men rakkha hai
ye chahti huun inhi daeron men jaan de duun
kuchh itna soz hi raqs-e-bhanvar men rakkha hai
palak jhapakte hi tahlil ho na jaae kahin
abhi to khvab sa manzar nazar men rakkha hai
mujhe to dhuup ke mausam qubul the lekin
ye saaya kis ne miri dopahar men rakkha hai
Leave a Reply