Shadab Anjum
laakh ḳhushki khet men khaliyan men maujud hai
aas barish ki dil-e-dahqan men maujud hai
baat sab ke fa.ede ki hai ye kaise maan len
jab ki dhamki aap ke elaan men maujud hai
manzil-e-maqsud main us ki badaulat pa.unga
ik adad jo hausla saman men maujud hai
zikr meri har ghazal men chahe us ka ho na ho
haan magar ik do jagah divan men maujud hai
fat.h ka elaan mat karna ai zalim tab talak
jab talak ik jang-ju maidan men maujud hai
jis ki ḳhatir daar par duniya chaḌhati hai hamen
vo bhi is jashn-e-azimushshan men maujud hai
aap ki ankhon se ‘anjum’ ho raha hai vo ayaan
jo takabbur aap ke ehsan men maujud hai
Leave a Reply