Nishant Shrivastava Nayab
mila hai apne hone ka nishan ik
suni sadiyon purani dastan ik
hamari soch to milti hai kitni
magar kyuun kar nahin apni zaban ik
mira har ik yaqin jhuTla raha hai
vo jo mujh men makin hai bad-guman ik
hue hain be-ma.ani bal-o-par ab
mila niche zamin ke asman ik
bure logon se milvata hai mujh ko
jatata hai vahi achchha yahan ik
meri chup se bhi vo jhunjhla raha hai
ḳhamoshi ki bhi hoti hai zaban ik
ḳhuda ko bhi rakhenge dastaras men
zamin par vo bana ke asman ik
na tere ho sake ham na hi apne
rahi aadhi adhuri dastan ik
Leave a Reply