miT gaya gham tire takallum se
lab hue ashna tabassum se
kis ke naqsh-e-qadam hain rahon men
jagmagate hain mah-o-anjum se
hai zamana baḌa zamana-shanas
kabhi mujh se gila kabhi tum se
naḳhuda bhi mila to aisa mila
ashna jo nahin talatum se
us ne aa kar mizaj puchh liya
ham to baiThe hue the gum-sum se
naḳhuda ne Dubo diya un ko
vo ki jo bach ga.e talatum se
zindagi hadson ki zad men hai
koi kaise bache tasadum se
saya-e-gul men baiThne vaalo
guftugu hogi daar par tum se
main ghazal ka asiir huun ‘ejaz’
sher paḌhta huun main tarannum se
Leave a Reply