Sardar Panchhi
apni maan ki dua.en paata huun
is liye hi to muskurata huun
pyaar ki bhuuk jab satati hai
doston se fareb khata huun
ye bhi mere liye ibadat hai
raston men diye jalata huun
log farhad mujh ko kahte hain
ghar men jab ju-e-shir laata huun
mujh ko patthar habib lagta hai
jab use hal-e-dil sunata huun
us se main kuchh bhi le nahin sakta
jab vo kahta hai le main daata huun
mere gham mere bachchon jaise hain
main jinhen god men khilata huun
vo hi jaḌvata hai anguThi men
jis kisi ko main raas aata huun
log samjhe ki ashk bahte hain
main to ankhon se giit gaata huun
dusre se nahin gharaz mujh ko
main to bas apne man ko bhata huun
meri ankhen hain meri shagirda
sharm karna jinhen sikhata huun
lutf-e-parvaz lene ki ḳhatir
man ke ‘panchhi’ ko ḳhud uḌata huun
Leave a Reply