dhuup baḌhne ke jo asar hue
kitne saa.e ke taraf-dar hue
tap ke kundan vo banenge kaise
jo jhulasne ko na tayyar hue
hai dava ishq to bimari bhi
ham dava ke liye bimar hue
jo na jismon ke talabgar hue
sirf vo vasl ke haqdar hue
qaid se un ko chhuḌa.e kaise
apne hathon jo giraftar hue
na hue gham-zada jo gham se mire
vo baḌe ḳhush hai ki gham-ḳhvar hue
baat karte hain jo aqdar ki vo
jab bhi mauqa mila bazar hue
aa.ine DhunDte ho tum har su
aur ham chehre se bezar hue
tab talak the baḌe naqqad ‘nava’
jab talak ḳhud se na do-char hue
Leave a Reply