main ne har-chand ki us kuche men jaana chhoḌa
par tasavvur men mire us ne na aana chhoḌa
us ne kahne se raqibon ke mujhe chhoḌ diya
jis ki ulfat men dila tu ne zamana chhoḌa
uTh gaya parda-e-namus mire ishq ka aah
us ne khiḌki men jo chilman ka lagana chhoḌa
haath se mere vo piita nahin muddat se sharab
yaaro kya apni ḳhushi main ne pilana chhoḌa
tere ‘ghamgin’ ko pareshani hai us roz se yaar
tu ne jis roz se zulfon ka banana chhoḌa
Leave a Reply