kahin ye ḳhvab mira zindagi na ban jaa.e
charagh bujhta hua raushni na ban jaa.e
main is ḳhayal se rota nahin huun sahra men
kahin ye dasht kisi din nadi na ban jaa.e
irada kar to rahe ho use chalane ka
magar ye tiir tumhara hansi na ban jaa.e
azab-e-vasl gavara to hai hamen lekin
ye ek lamha rahe ik sadi na ban jaa.e
ajiib rang hain khinche hi ja rahe hain mujhe
jo main banata nahin huun vahi na ban jaa.e
samundaron men jise main ne bahte dekha hai
mira nasib vo tishna-labi na ban jaa.e
bhaTak raha hai bahut rat-din koi mahtab
makan us ka kahin be-ghari na ban jaa.e
tamam-umr jo tanha.i men raha meri
vo anjuman men kahin ajnabi na ban jaa.e
usi ḳhayal se toḌe ga.e sabhi kashkol
hamare shahar men koi saḳhi ban jaa.e
Leave a Reply