Zia Zameer
dard ki dhuup Dhale gham ke zamane jaa.en
dekhiye ruuh se kab daagh purane jaa.en
ham ko bas teri hi chaukhaT pe paḌe rahna hai
tujh se bichhḌen na kisi aur Thikane jaa.en
apni divar-e-ana aap hi kar ke mismar
apne ruThon ko chalo aaj manane jaa.en
jaane kya raaz chhupa hai tiri salari men
tu jahan jaa.e tire pichhe zamane jaa.en
rahen gumnam to bas tujh se hi mansub rahen
jaane jaa.en to tire naam se jaane jaa.en
dekh pa.enge un ankhon men udasi kaise
apne dukhḌe na ‘ziya’ un ko sunane jaa.en
Leave a Reply