tum ne dekhi hai kabhi ek zan-e-ḳhana-ba-dosh
jis ke ḳheme se pare raat ki tariki men
gursana bhediye ghurrate hain
duur se aati hai jab us ki lahu ki ḳhushbu
sansanati hain darindon ki hansi
aur danton men kasak hoti hai
ki karen us ka badan sad-para
apne ḳheme men simat kar aurat
raat ankhon men bita deti hai
kabhi karti hai alaao raushan
bhediye duur bhagane ke liye
kabhi karti hai ḳhayal
tez nukila jo auzar kahin mil jaae
to bana le hathiyar
us ke ḳheme men bhala kya hoga
tuute phute hue bartan do-char
dil ke bahlane ko shayad ye ḳhayal aate hain
us ko malum hai shayad na sahar ho paae
sote bachchon pe jamae nazren
kaan aahat pe dhare baithi hai
haan dhyan us ka jo bat jaae kabhi
gungunati hai koi bisra giit
kisi banjare ka