sitam ahl-e-karam farma rahe hain
vafaon ko pasine aa rahe hain
uTha.e hain jo patthar mariyega
tavaqquf aap kyuun farma rahe hain
ghazal ko ḳhun-e-dil se aab de kar
ma.ani ham na.e pahna rahe hain
mujhe meri javani ke taqaze
tamannaon se kyuun uljha rahe hain
sar-e-mahfil ghazal jo na-rava thi
use tanha.i men ḳhud ga rahe hain
na ‘anjum’ dastan-e-dil sunao
vo dekho log uTh kar ja rahe hain
Leave a Reply