dasht ke ḳhaas havale nazar aate hain mujhe
paanv men ḳhuun ke chhale nazar aate hain mujhe
haif-sad-haif tujhe dekh nahin paata main
shukr-sad-shukr ujale nazar aate hain mujhe
niind lagti hai chamakte hue suraj ka shikar
ḳhvab ankhon ke nivale nazar aate hain mujhe
tum unhen andha samajhne ki himaqat na karo
ye to sab dekhne vaale nazar aate hain mujhe
jab se ghar chhoḌ ki vo chand gaya hai mera
chhat to chhat farsh pe jaale nazar aate hain mujhe
ye kahin shahr-e-tasavvuf to nahin duur talak
sab ke kandhon pe doshale nazar aate hain mujhe
dekhta huun main na.e Dhang se duniya ko ‘fida’
aur manzar bhi nirale nazar aate hain mujhe
Leave a Reply