Poet
gham ke tapte hue sahra se nikale mujh ko
kya koi hai jo nigahon men chhupa le mujh ko
kaisi ma.asum tamanna hai dil-e-nadan ki
main jo bikhrun to vahi aa ke sanbhale mujh ko
rasm-e-ulfat to kabhi vo bhi nibha.e aa kar
main ḳhafa huun to kabhi vo bhi mana le mujh ko
tu mujhe chhoḌ ke gumnam na ho jaa.e kahin
teri pahchan huun mathe pe saja le mujh ko
teri mahfil men andhere ki shikayat kyon ho
main tira diip huun jab chahe jala le mujh ko
teri halki si tavajjoh bhi mujhe kaafi hai
be-ruḳhi teri kahin maar na Daale mujh ko
thak ke rukna rah-e-ulfat men sitam hai anvar
dars dete hain mire paanv ke chhale mujh ko
Leave a Reply