Hari Chand Akhtar
zindagi-bhar dahr ki nairangiyan dekha kiye
gardish-e-ayyam-o-daur-e-asman dekha kiye
ham asiran-e-qafas ki haa.e re majburiyan
samne ankhon ke jalta ashiyan dekha kiye
ashiyan bandha kiye har fasl-e-gul men ham-safir
aur ham apne qafas ki tiliyan dekha kiye
ashiyan bandha magar asudgi ka zikr kya
kis tarah girti hain us par bijliyan dekha kiye
jaan bhi aḳhir maraz ke saath ruḳhsat ho ga.i
ham tiri rah ai masiha-e-zaman dekha kiye
Leave a Reply