jahan pe phuul the aur yaad bhi tumhari thi
usi paḌav pe ham ne thakan utari thi
usi ka aks tha vo chand tha ki suraj tha
magar vo dekhne vaali nazar hamari thi
subuk-ḳhiram chala aur kabhi main Thahra raha
ki meri apne hi saa.e se jang jaari thi
main apne ḳhvab ke andar bhi ḳhvab dekhta tha
khuli jab aankh to ik kapkapi si taari thi
main us ke dil se jab utra to zaḳhm aa.e nazar
ki us ke miThe se lahje men sang-bari thi
main us ke hijr ki atish men kuchh jala aise
kaḌa tha din bhi bahut raat mujh pe bhari thi
main shaḳh-e-dil se uThata tha phuul girye ke
adu ki aankh men manzar vo tez aari thi
Leave a Reply