tum ho ya chheḌti hai yad-e-sahar koi to hai
khaTkhaTata hai jo ye ḳhvab ka dar koi to hai
dil pe paḌti hui duzdida-nazar koi to hai
jis taraf dekh raha huun main udhar koi to hai
aise nadan nahin raton men bhaTakne vaale
jagti ankhon men ḳhurshid-e-sahar koi to hai
ḳhud-baḳhud haath gareban ki taraf uThte hain
sarsarati si havaon men ḳhabar koi to hai
kis ka munh dekh rahi hai safar-amada hayat
su-e-maqtal hi sahi rahguzar koi to hai
tu mujhe dekh mire paanv ke chhalon pe na ja
zindagi tere liye ḳhak-basar koi to hai
din kaTa saara ḳharabon men bhaTakte ‘aḳhtar’
shaam hoti hai chalo ḳhair se ghar koi to hai
Leave a Reply