Dar-O-Diwar Sab Aundhe Girenge

dar-o-dīvār sab auñdhe gireñge

purāne ghar hameñ rote raheñge

baqā ke shahr meñ jaane se pahle

ham apne jism ke andar mareñge

shu.ūr-o-harf bhī jo chhin ga.e to

akele dasht meñ ham kyā kareñge

kahāñ tak jism ke de kar nivāle

zamīñ kā peT ham bharte raheñge

sahar kī raushnī phūTe na jab tak

añdherī shab kī āñkhoñ meñ jaleñge

hamāre ba.ad is kamre ke shāyad

ye parde der tak hilte raheñge

maiñ lauTā to shajar dariyā parinde

ḳhushī se merā māthā chuum leñge

‘figār’ ik din mire pairoñ ke chhāle

jo phūTe to na.e raste baneñge

Leave a Comment