lutf-e-bahar mushfiq-e-man dekhte chalo
bulbul ka Dhang rang-e-chaman dekhte chalo
bankon ko bankpan ko milao na ḳhaak men
tan tan ke yuun na apna badan dekhte chalo
jaate agar ho kucha-e-qatil ki sair ko
kapḌa bhi thoḌa bahr-e-kafan dekhte chalo
chashm-e-butan-e-dahr ki aafat hain shoḳhiyan
sahra-e-husn ke bhi hiran dekhte chalo
kya kar rahi hai pesha-e-mashshatgi bahar
ara.ish-e-urus-e-chaman dekhte chalo
karti hai rah-e-shauq men kis kis ko pa.emal
raftar-e-yar ke bhi chalan dekhte chalo
aa.e ho said-gah-e-jahan men to ai ‘qalaq’
tarz-e-shikar-e-tir-fagan dekhte chalo
Leave a Reply