Masud Husain Khan
tire ḳhayal men dil aaj sogvar sa hai
mujhe guman hai kuchh us ko intizar sa hai
main sada-dil tha ki daman pe un ke ro bhi diya
magar gulon ke dilon men abhi ghubar sa hai
vo mo’atabar to nahin hai par is ko kya kiije
ki us ke va.adon pe phir aaj e.atibar sa hai
main tujh se ramz-e-mohabbat kahun to kaise kahun
main be-qarar huun aur tujh ko kuchh qarar sa hai
tujhi pe kuchh nahin mauquf ai dil-e-mahrum
jahan bhi dekhiye aalam men intishar sa hai
tu hosh-mand kahan ka tha kuchh to kah ‘mas.ud’
ye kya hai aaj tujhe dil ye iḳhtiyar sa hai
Leave a Reply