shab vasl ki bhi chain se kyunkar basar karen
jab yuun nigahbani murgh-e-sahar karen
mahfil men ik nigah agar vo idhar karen
sau sau ishare ghair se phir raat bhar karen
tufan-e-nuh laane se ai chashm faeda
do ashk bhi bahut hain agar kuchh asar karen
aaz o havas se khalq hua hai ye na-murad
dil par nigah kya hai vo mujh par nazar karen
kuchh ab ke ham se bole to ye ji men hai ki phir
naseh ko bhi raqib se azurda-tar karen
vaan hai vo naghma jis se ki huron ke hosh jaaen
yaan hai vo naala jis se farishte hazar karen
ahl-e-zamana dekhte hain aib hi ko bas
kya faeda jo ‘shefta’ arz-e-hunar karen
Leave a Reply