gardish men zahr bhi hai musalsal lahu ke saath
marta bhi ja raha huun main apni numu ke saath
jin mausamon men teri rifaqat thi na-guzir
tu ne ruten bana.i hain vo bhi adu ke saath
mujh ko ata hua hai ye kaisa libas-e-zist
baḌhte hain jis ke chaak barabar rafu ke saath
mujh ko vahi mila mujhe jis ki talab na thi
mashrut kuchh nahin hai yahan aarzu ke saath
ab jam-e-jam se log yahan mutma.in nahin
‘jazib’ guzar rahi hai shikasta subu ke saath
Leave a Reply