Saqib Lakhnavi
yuun akela dasht-e-ghurbat men dil-e-nakam tha
pichhe pichhe maut thi aage ḳhuda ka naam tha
bante hi ghar ibtida men ru-kash-e-anjam tha
tinke chun kar jab nazar ki ashiyan ik daam tha
be-mahal dil ke bujhane se unhen kya mil gaya
jis ko sham-e-sub.h samjhe vo charagh-e-sham tha
hal-e-mun.im ḳhud-gharaz kya janen mai-ḳhana men kal
rind the be-fikr gardish men dimagh-e-jam tha
bas yahi fiqra ki sham-e-hijr ne maara mujhe
koi kah aata to kitna muḳhtasar paigham tha
saikḌon baar ek ah-e-sard se tharra chuka
kis qadar nazdik dil se asman ka baam tha
namvar phir kaun hoga kar-zar-e-dahr men
jab yahan dil sa alam-bardar-e-gham gumnam tha
monis-e-vahdat ko kho baiTha baḌi mushkil ye hai
kaTna ik sham-e-furqat ka zara sa kaam tha
sau jagah se chhin raha tha jab tu Darta kis liye
kha gaya dhoka ki mere dil ki surat daam tha
sar chaḌhaya main ne chun chun kar ḳhas-o-ḳhashak ko
baagh ke tinke the vo jin ka nasheman naam tha
zab.h men ik bhiiḌ si dekhi thi lekin kya ḳhabar
gard meri hasraten thiin ya hujum-e-am tha
mere naale the shab-e-furqat men kitne bar-mahal
un ke kanon men magar ik shor-e-be-hangam tha
kya zamane ka gila ‘saqib’ kisi ka kya qusur
ye dil-e-gham-dost ḳhud hi dushman-e-aram tha
Leave a Reply