Mile Jo Us Se to Yaadon Ke Par Nikal Aae

mile jo us se to yādoñ ke par nikal aa.e

is ik maqām pe kitne safar nikal aa.e

ujaaḌ dasht meñ bas jaa.e merī vīrānī

ajab nahīñ ki yahīñ koī ghar nikal aa.e

bas ek lamhe ko chamkī thī us kī teġh-e-nazar

ḳhalā-e-vaqt meñ qarnoñ ke sar nikal aa.e

machān bāñdhne vaale nishāna chuuk ga.e

ki ḳhud machān kī jānib se Dar nikal aa.e

shahīd-e-kū-e-mohabbat haiñ kaañp jaate haiñ

nadīm ḳhair se koī agar nikal aa.e

daraḳht-e-sabr-burīda sahī pe jānte haiñ

huā hai ye bhī ki us par samar nikal aa.e

adū ke haath bhī teġh o tabar se ḳhālī haiñ

ajiib kyā hai jo ham be-sipar nikal aa.e

ġham-e-jahān o ġham-e-yār do kināre haiñ

udhar jo Duube vo aksar idhar nikal aa.e

yahāñ to ahl-e-hunar ke bhī paañv jalte haiñ

ye rāh-e-sher hai ‘arshad’ kidhar nikal aa.e

Leave a Comment