mile jo us se to yadon ke par nikal aa.e
is ik maqam pe kitne safar nikal aa.e
ujaaḌ dasht men bas jaa.e meri virani
ajab nahin ki yahin koi ghar nikal aa.e
bas ek lamhe ko chamki thi us ki tegh-e-nazar
ḳhala-e-vaqt men qarnon ke sar nikal aa.e
machan bandhne vaale nishana chuuk ga.e
ki ḳhud machan ki janib se Dar nikal aa.e
shahid-e-ku-e-mohabbat hain kaanp jaate hain
nadim ḳhair se koi agar nikal aa.e
daraḳht-e-sabr-burida sahi pe jante hain
hua hai ye bhi ki us par samar nikal aa.e
adu ke haath bhi tegh o tabar se ḳhali hain
ajiib kya hai jo ham be-sipar nikal aa.e
gham-e-jahan o gham-e-yar do kinare hain
udhar jo Duube vo aksar idhar nikal aa.e
yahan to ahl-e-hunar ke bhi paanv jalte hain
ye rah-e-sher hai ‘arshad’ kidhar nikal aa.e
Leave a Reply