mauj-e-dariya ki tarah raqs-kunan rahte hain
ham se mat puchhiye kis vaqt kahan rahte hain
dil ki betabiyan ma.ashuq naya chahti hain
us taraf chal ki jahan mah-ruḳhan rahte hain
sar-bulandi hai muqaddar se amal se hasil
haan ta.aqub men to kotah-qadan rahte hain
kaash ho jaa.e kabhi ham se koi kaar durust
zindagi men to bahut kar-e-ziyan rahte hain
ham ko patthar na samjhiye ki hain moti ham log
sab se chhup-chhup ke tah-e-ab-e-ravan rahte hain
jhuriyan jild pe aane se buzurgi kaisi
ham to andar ki hararat se javan rahte hain
Leave a Reply