hai yaqinan ye koi raz-e-mashiyyat varna
log karte hi nahin shahr se hijrat varna
us ki nafrat ka diya ham ne mohabbat se javab
kam na thi ḳhuun men kuchh apne bhi hiddat varna
tujh ko dekha to yaqin ho gaya ai mast-e-ḳhiram
dekhta aankh se kaun apni qayamat varna
ḳhuun men sab ke hai qabil ke ḳhuun ka unsur
nasl-e-adam ke liye vaj.h-e-halakat varna
ai ‘sharar’ main ne hi suraj se mila.i ankhen
kis ne ki mere siva aisi jasarat varna
Leave a Reply