Rais Amrohvi
Dhal ga.i hasti-e-dil yuun tiri ra.ana.i men
madda jaise nikhar jaa.e tavana.i men
pahle manzil pas-e-manzil pas-e-manzil aur phir
raste Duub ga.e alam-e-tanha.i men
gaahe gaahe koi jugnu sa chamak uThta hai
mere zulmat-kada-e-anjuman-ara.i men
DhunDhta phirta huun ḳhud apni basarat ki hudud
kho ga.i hain miri nazren miri bina.i men
un se mahfil men mulaqat bhi kam thi na magar
uf vo adab jo barte ga.e tanha.i men
yuun laga jaise ki bal kha ke dhanak TuuT ga.i
us ne vaqfa jo liya naaz se angḌa.i men
kis ne dekhe hain tiri ruuh ke riste hue zaḳhm
kaun utra hai tire qalb ki gahra.i men
Leave a Reply