Sarfraz Arish
ashk in sipiyon men bhar jaa.en
to vahan Dubne guhar jaa.en
ḳhamushi ab tiri vazahat ko
tere mimbar se ham utar jaa.en
dasht sab ke liye nahin vahshat
kuchh talabgar apne ghar jaa.en
raste mere paas baiTh rahen
fasle duur se guzar jaa.en
titliyan rang jhaaḌ len apne
phir tire honT par utar jaa.en
ham bhi dariya ke na-dahinda hain
kashtiyan chhoḌ kar kidhar jaa.en
ra.egani pe fatiha kahne
ham suhulat ki qabr par jaa.en
zo.am shoridgi ke maare hue
lafz avaz par utar jaa.en
aaj bas ḳhal-o-ḳhad uTha.e chalen
ḳhvahishen a.inon men dhar jaa.en
tu koi maz.haka nahin hai ki ham
dastaras men ḳhuda ki mar jaa.en
na-rasa.i ki chaah men ‘arish’
abla-pa mire safar jaa.en
Leave a Reply