Hamari Jagti Aankhon Mein Khwab Sa Kya Tha

hamari jagti ankhon men khvab sa kya tha

ghaneri shab men uga aftab sa kya tha

kahin hui to thi halchal kahin pe gahre men

bigad bigad ke vo banta habab sa kya tha

tamam jism men hoti hain larzishen kya kya

savad-e-jan men ye bajta rabab sa kya tha

hamari pyaas pe barsa andhere ujiyale

vo kuchh ghataon sa kuchh mahtab sa kya tha

zara si der bhi rukta to kuchh pata chalta

vo rang tha ki thi khushbu sahab sa kya tha

ye tishnagi ka safar kat gaya hai jis ke tufail

vo dasht dasht chhalakta sarab sa kya tha

tamam umr khapaya hai jis men sar ‘bilqis’

bhala vo be-sar-o-pa si kitab sa kya tha

Leave a Comment