Aftab Hussain
nigah ke liye ik khvab bhi ghanimat hai
vo tirgi hai ki ye raushni ghanimat hai
chalo kahin pe taalluq ki koi shakl to ho
kisi ke dil men kisi ki kami ghanimat hai
kam o ziyada pe israr kya kiya jaae
hamare daur men itni si bhi ghanimat hai
badal rahe hain zamane ke rang kya kya dekh
nazar utha ki ye nazzargi ghanimat hai
na jaane vaqt ki gardish dikhaegi kya rukh
guzar rahi hai jo ye zindagi ghanimat hai
gham-e-jahan ke jhamelon men aftab ‘husain’
khayal-e-yar ki asudgi ghanimat hai
Leave a Reply