bach ke vo nikalte hain jin se ru-shanasi hai
zindagi hamari to ab ajal-numa si hai
jazb ho ga.i dil ki be-kali fazaon men
is taraf hai sannaTa us taraf udasi hai
dilkashi ghazab ki hai husn-e-sada-kari men
kis ke dast-e-rangin ne phuul ki qaba si hai
ḳhushki-e-lab-e-sahil kah rahi hai pyason se
kya bisat-e-dariya ḳhud us ki ruuh pyasi hai
is qadar paḌa paani khet jal gaya saara
abr ki tabi.at bhi barq-e-sho.ala-za si hai
ruh-e-ḳhud-shanasi hai aadmi ki ḳhuddari
ḳhud-shanasi-e-insan asl-e-haq-shanasi hai
Leave a Reply