bashar-nawaz

Roz Kahan Se Koi Naya-Pan Apne Aap Mein Laenge

roz kahan se koi naya-pan apne aap men laenge

tum bhi tang aa jaoge ik din ham bhi ukta jaenge

chadhta dariya ek na ik din khud hi kinare katega

apne hanste chehre kitne tufanon ko chhupaenge

aag pe chalte chalte ab to ye ehsas bhi kho baithe

kya hoga zakhmon ka mudava daman kaise bachaenge

vo bhi koi ham hi sa maasum gunahon ka putla tha

nahaq us se lad baithe the ab mil jaae manaenge

is janib ham us janib tum biich men haail ek alaav

kab tak ham tum apne apne khvabon ko jhulsaenge

sarma ki rut kaat ke aane vaale parindo ye to kaho

duur des ko jaane vaale kab tak laut ke aenge

tez havaen aankhon men to ret dukhon ki bhar hi gaiin

jalte lamhe rafta rafta dil ko bhi jhulsaenge

mahfil mahfil apna taalluq aaj hai ik mauzu-e-sukhan

kal tak tark-e-taalluq ke bhi afsane ban jaenge

More Poems

Leave a Comment